Sorsunnersuarmi kingullermi Amerikamiut sakkutooqarfiat
Narsarsuaq kangerluup qinngorpasissuaniippoq kuup akuata eqqaani. Sorsunnersuarmi kingullermi Amerikamiut aalajangerput timmisartunut Europaliartunut mittarfiliorniarlutik, tamaanilu Amerikamiut sakkutuui mittarfiliorput isertortumik taaguuserlugu Bluie West 1.

Bluie West 1 suleruloornikkut ullormiit ullormut mittarfiliarineqarpoq. Aamma napparsimmavik 600-nut naatsorsuusaq sananeqarpoq. Normandiami nunnigussinermi ikilikkanut katsorsaavissatut naatsorsuusaavoq.

Sorsunnersuup kingulliup kingorna Narsarsuaq Amerikamiut najuinnarpaat. 1945-p naalernerani inuit 1000-it tikillugit najugaqarput - taamaalilluni taamani Narsarsuaq Nunatsinni inuttunersaasimalluni.

Koreami sorsunneq - napparsimmavimmit tusatsiakkat
Koreami sorsunnermi mittarfik pingaaruteqaqqilerpoq, napparsimmavillu inunnut 1000-inut allineqarpoq.
Ukiut ingerlanerini tusatsiagaajuarpoq sakkutuut Koreami ikilerujussuarneqarsimasut Narsarsuarmi passun-
neqartartut innuttaasunit toqqorlugit, innuttaasut USA-mi sorsunnermut tapersersuinerat annikillisinniarnagu. Tusatsiakkalli uppernarsaatissaqanngillat.

Napparsimmavik 1958-mi matuneqarpoq, napparsimmaviullu illutaa 1972-mi nunguilluni ikuallappoq. Niviarsiat isersimaartarfiata pujoorfia napparsimmaveqarfiusimasumi kisiartaalluni takuneqarsinnaavoq.

Narsarsuaq ullumikkut
Ullumikkut Narsarsuaq nunat tamalaat akornanni mittarfissuuvoq, takuniagassanut angalanermi aallaaviusoq Kujataanullu angalanernut aallaaviusoq. Mittarfiup oqaluttuassartaa paasisaqarfigisinnaavat Narsarsuup Katersugaasiviani.